إحنا مجموعة من الصيع والعواطلية، ومعندناش أي مؤهلات تسمحلنا نعمل حاجة مفيدة للمجتمع، فقلنا بدل ما نضيع وقتنا… ننصب عليك مباشرة.
معندناش شركة كبيرة، ولا مقر شيك، ولا فريق خدمة عملاء بيقولك حضرتك تهمنا. إحنا شغالين بنظام ربنا يسهل والمندوب يوصل.
01
بيانات الشركة
- السجل التجاري
- لسه بندور عليه.
- البطاقة الضريبية
- إحنا أصلًا بنحاول ما نلفتش نظر حد.
- الفواتير
- متقلقش، إحنا بنوفر الورق حفاظًا على البيئة.
- عنواننا
- متغير حسب الظروف.
- رقم التليفون
- قابل للتحديث في أي لحظة ومن غير سابق إنذار.
- الصفحة
- لو اختفت فجأة، اعتبر إننا بنعمل Rebranding.
02
خدمة العملاء
موجودة طول ما إنت بتسأل قبل الدفع.
بعد الدفع بقى… كل واحد وظروفه.
الإدارة المالية
إحنا مش عندنا إدارة مالية، عندنا واحد ماسك الموبايل وبيشوف التحويل وصل ولا لأ.
03
سياسة الاسترجاع
ومش عندنا سياسة استرجاع، لأننا مؤمنين إن الماضي لازم يفضل في الماضي.
إحنا بنشتغل بنظام بسيط جدًا:
إنت تثق فينا، وإحنا نستغل الثقة دي بأقصى كفاءة.
مفيش وعود كدابة عندنا. إحنا بنقولك من الأول إن الحاجة مش مضمونة، والخدمة ممكن تتأخر، والدعم ممكن يختفي، والفلوس ممكن تدخل رحلة روحية متعرفش ترجع منها.
على الأقل إحنا مختلفين عن غيرنا في حاجة واحدة:إحنا بنقولك الخازوق قبل ما تاخده.
الخازوق — كل حاجة وهمية… إلا الخازوق.